naqsh-o-nigar-e-zist ka saman na kar sake

naqsh-o-nigār-e-zīst kā sāmāñ na kar sake

apnā lahū jo sarf-e-gulistāñ na kar sake

vo kam-nasīb jin kī ḳhizāñ meñ khulī thī aañkh

andāza-e-jamāl-e-bahārāñ na kar sake

har ek nāḳhudā ne safīnoñ pe ḳhair se

ehsān vo kiye haiñ jo tūfāñ na kar sake

apne bhī dāġh-e-dil mah-o-anjum se kam na the

ye aur baat hai ki farozāñ na kar sake

is vāste har ik ko nayā ġham diyā gayā

koī kisī ke dard kā darmāñ na kar sake

vo ġham-gusārī-e-ġham-e-daurāñ kareñge kyā

jo pās-e-ḳhātir-e-ġham-e-daurāñ na kar sake

'fārūq' tum ne ḳhud ko musalmāñ to kar liyā

us kufr-mājrā ko musalmāñ na kar sake

naqsh-o-nigar-e-zist ka saman na kar sake

apna lahu jo sarf-e-gulistan na kar sake

wo kam-nasib jin ki KHizan mein khuli thi aankh

andaza-e-jamal-e-bahaaran na kar sake

har ek naKHuda ne safinon pe KHair se

ehsan wo kiye hain jo tufan na kar sake

apne bhi dagh-e-dil mah-o-anjum se kam na the

ye aur baat hai ki farozan na kar sake

is waste har ek ko naya gham diya gaya

koi kisi ke dard ka darman na kar sake

wo gham-gusari-e-gham-e-dauran karenge kya

jo pas-e-KHatir-e-gham-e-dauran na kar sake

'faruq' tum ne KHud ko musalman to kar liya

us kufr-majra ko musalman na kar sake