narm lahje mein tahammul se zara baat karo

narm lahje meñ tahammul se zarā baat karo

phir ba-sad-shauq sar-e-ām mujhe maat karo

yā nisār aaj karo mujh pe tamām apne hunar

yā nazar-band mire saare kamālāt karo

maiñ rivāyāt se bāġhī to nahīñ huuñ lekin

tum se mumkin ho to tabdīl-e-ḳhayālāt karo

ek muddat se mire dil kā nagar hai vīrāñ

aao is dasht pe tum phūloñ kī barsāt karo

fasl ujāloñ kī siyah-baḳht zamīñ uglegī

zar-nigār apne zarā kashf-o-karāmāt karo

is tarah mil ke bichhaḌnā to qayāmat hogā

mushta.il tum na mirī jaañ mire jazbāt karo

be-niyāzī to milā kartī hai duniyā se 'ḳhayāl'

tum kisī taur na tajdīd-e-ġham-e-zāt karo

narm lahje mein tahammul se zara baat karo

phir ba-sad-shauq sar-e-am mujhe mat karo

ya nisar aaj karo mujh pe tamam apne hunar

ya nazar-band mere sare kamalat karo

main riwayat se baghi to nahin hun lekin

tum se mumkin ho to tabdil-e-KHayalat karo

ek muddat se mere dil ka nagar hai viran

aao is dasht pe tum phulon ki barsat karo

fasl ujalon ki siyah-baKHt zamin uglegi

zar-nigar apne zara kashf-o-karamat karo

is tarah mil ke bichhaDna to qayamat hoga

mushtail tum na meri jaan mere jazbaat karo

be-niyazi to mila karti hai duniya se 'KHayal'

tum kisi taur na tajdid-e-gham-e-zat karo