نشاط دنیا کو خواب لکھنا مسرتوں کو سراب لکھنا

نشاط دنیا کو خواب لکھنا مسرتوں کو سراب لکھنا

جو ہو سکے تو غم و الم کی حکایت پر کتاب لکھنا

میں سرگزشت حیات اپنی صحیفۂ دل پہ لکھ رہا ہوں

تو عہد رفتہ کے موسموں کو نئے دنوں کا عذاب لکھنا

میں اپنی تہذیب کے حوالے سپرد قرطاس کر چکا ہوں

ترے مقدر میں کیا نہیں ہے کوئی درخشندہ باب لکھنا

ہیں میری آنکھوں میں خواب تیرے اسی لئے تو ہیں زخم گہرے

کسی کے بس میں نہیں ہے شاید حکایت اضطراب لکھنا

میں اپنی چشم مشاہدہ سے جو دیکھتا ہوں وہی لکھوں گا

خلاف شان سخنوری ہے قصیدۂ آب و تاب لکھنا

یہ دشت امکان آرزو ہے یہیں خیابان جستجو ہے

یہاں کے موسم کی سرکشی کو علامت انقلاب لکھنا

دیار احساس کے مکینوں کے سر پہ تاج سخنوری ہے

تو ایسے زندہ دلوں کو اخترؔ ہمیشہ عزت مآب لکھنا