nashat-e-hijr ko teri kami ko bhul gae

nashāt-e-hijr ko terī kamī ko bhuul ga.e

tire ḳhayāl meñ Duube tujhī ko bhuul ga.e

vo duniyā-dār haiñ ham ne kabhī kahā to na thā

ajiib log haiñ is sādgī ko bhuul ga.e

adū ne ham se hamārā ġhurūr māñgā thā

anā-parast the ham zindagī ko bhuul ga.e

junūñ kā ek taqāzā thā sirf sar-mastī

kitāb jhoñk dī ham āgahī ko bhuul ga.e

ye kaisī bazm sajī qahqaha nahīñ gūñjā

gumāñ hai tum bhī kisī aadmī ko bhuul ga.e

kisī ke ashk ne sairāb kar diyā 'shāh-jī'

so ham ġharīb-e-vatan tishnagī ko bhuul ga.e

nashat-e-hijr ko teri kami ko bhul gae

tere KHayal mein Dube tujhi ko bhul gae

wo duniya-dar hain hum ne kabhi kaha to na tha

ajib log hain is sadgi ko bhul gae

adu ne hum se hamara ghurur manga tha

ana-parast the hum zindagi ko bhul gae

junun ka ek taqaza tha sirf sar-masti

kitab jhonk di hum aagahi ko bhul gae

ye kaisi bazm saji qahqaha nahin gunja

guman hai tum bhi kisi aadmi ko bhul gae

kisi ke ashk ne sairab kar diya 'shah-ji'

so hum gharib-e-watan tishnagi ko bhul gae