nashat-e-naghma bhi hai masti-e-KHumar bhi hai

nashāt-e-naġhma bhī hai mastī-e-ḳhumār bhī hai

tire jamāl meñ ra.anā.ī-e-bahār bhī hai

nigāh-e-nāz kī mahjūb sehr-āgīnī

adab-navāz bhī hai shoḳh-o-sharmsār bhī hai

surūr-o-sukr kā aalam ajiib aalam hai

ki ḳhvāb-o-ḳhamr bhī hai sho.ala-o-sharār bhī hai

tirī adāoñ kī ḳhū-e-ramīdgī vallāh

hai ek raaz ki pinhāñ bhī āshkār bhī hai

sitam hai sādgī-e-chashm surma-sā jis meñ

vafā kā loch mohabbat kā e.atibār bhī hai

ik iztirāb ik ehsās-e-tishna-kāmī kā

tire huzūr meñ haijān bhī qarār bhī hai

sabā vo sarv-e-ravāñ gar mile to kah us se

kisī ko shām-e-alam terā intizār bhī hai

tū mere ḳhanda-e-masrūr-o-mutma.in pe na jā

ik aarzū mire pahlū meñ sogvār bhī hai

kise batā.ūñ garāñ-jāñ hai is qadar 'ḳhālid'

ki ain ālam-e-mastī meñ hoshiyār bhī hai

nashat-e-naghma bhi hai masti-e-KHumar bhi hai

tere jamal mein ranai-e-bahaar bhi hai

nigah-e-naz ki mahjub sehr-agini

adab-nawaz bhi hai shoKH-o-sharmsar bhi hai

surur-o-sukr ka aalam ajib aalam hai

ki KHwab-o-KHamr bhi hai shoala-o-sharar bhi hai

teri adaon ki KHu-e-ramidgi wallah

hai ek raaz ki pinhan bhi aashkar bhi hai

sitam hai sadgi-e-chashm surma-sa jis mein

wafa ka loch mohabbat ka eatibar bhi hai

ek iztirab ek ehsas-e-tishna-kaami ka

tere huzur mein haijaan bhi qarar bhi hai

saba wo sarw-e-rawan gar mile to kah us se

kisi ko sham-e-alam tera intizar bhi hai

tu mere KHanda-e-masrur-o-mutmain pe na ja

ek aarzu mere pahlu mein sogwar bhi hai

kise bataun garan-jaan hai is qadar 'KHalid'

ki ain aalam-e-masti mein hoshiyar bhi hai