nashat kam hai ki saman-e-dilkashi kam hai

nashāt kam hai ki sāmān-e-dilkashī kam hai

sharīk-e-bazm nahīñ haiñ to kyā tumheñ ġham hai

ḳhudī kā zor hai ehsās-e-bandagī kam hai

ik inqalāb se barham nizām-e-ālam hai

hayāt vājib-o-mumkin kā rabt-e-bāham hai

hamāre dil kī taḌap hāsil-e-do-ālam hai

fareb jab se mohabbat pe ho gayā ġhālib

ik iztirāb hai bechain rūh-e-ālam hai

natīja aish-e-musalsal kā shauq-e-mamnūāt

ajab nahīñ ki ye mīrās-e-ibn-e-ādam hai

shajar nihāl haiñ ḳhandāñ haiñ gul khilīñ kaliyāñ

chaman meñ jān-e-tamannā kā ḳhair-maqdam hai

ye har ghaḌī kī pareshāñ-ḳhayāliyāñ 'āġhā'

tafakkurāt-e-zamāna se naak meñ dam hai

chhupā sakā na mohabbat ke raaz ko 'āġhā'

hazār zabt kiyā phir bhī aañkh pur-nam hai

nashat kam hai ki saman-e-dilkashi kam hai

sharik-e-bazm nahin hain to kya tumhein gham hai

KHudi ka zor hai ehsas-e-bandagi kam hai

ek inqalab se barham nizam-e-alam hai

hayat wajib-o-mumkin ka rabt-e-baham hai

hamare dil ki taDap hasil-e-do-alam hai

fareb jab se mohabbat pe ho gaya ghaalib

ek iztirab hai bechain ruh-e-alam hai

natija aish-e-musalsal ka shauq-e-mamnuat

ajab nahin ki ye miras-e-ibn-e-adam hai

shajar nihaal hain KHandan hain gul khilin kaliyan

chaman mein jaan-e-tamanna ka KHair-maqdam hai

ye har ghaDi ki pareshan-KHayaliyan 'agha'

tafakkuraat-e-zamana se nak mein dam hai

chhupa saka na mohabbat ke raaz ko 'agha'

hazar zabt kiya phir bhi aankh pur-nam hai