nashe ki aag mein dekha gulab yani tu

nashe kī aag meñ dekhā gulāb ya.anī tū

badan ke jaam meñ desī sharāb ya.anī tū

hamāre lams ne sab taar kas diye us ke

vo jhanjhanāne ko bekal rabāb ya.anī tū

har ek chehra nazar se chakhā huā dekhā

har ik nazar se achhūtā shabāb ya.anī tū

safed qalmeñ huiiñ to siyāh-zulf milī

ab aisī umr meñ ye inqalāb ya.anī tū

mai ḳhud hī apnī nigāhoñ ki daad detā huuñ

hazār chehroñ meñ ik intiḳhāb ya.anī tū

mile mile na mile nekiyoñ kā phal mujh ko

ḳhudā ne de diyā mujh ko savāb ya.anī tū

gudāz jism kamal hoñT marmarī bāheñ

mirī tabī'at pe likkhī kitāb ya.anī tū

maiñ tere ishq se pahle gunāh kartā thā

mujhe diyā gayā dilkash azaab ya.anī tū

nashe ki aag mein dekha gulab yani tu

badan ke jam mein desi sharab yani tu

hamare lams ne sab tar kas diye us ke

wo jhanjhanane ko bekal rabab yani tu

har ek chehra nazar se chakha hua dekha

har ek nazar se achhuta shabab yani tu

safed qalmen huin to siyah-zulf mili

ab aisi umr mein ye inqalab yani tu

mai KHud hi apni nigahon ki dad deta hun

hazar chehron mein ek intiKHab yani tu

mile mile na mile nekiyon ka phal mujh ko

KHuda ne de diya mujh ko sawab yani tu

gudaz jism kamal honT marmari bahen

meri tabi'at pe likkhi kitab yani tu

main tere ishq se pahle gunah karta tha

mujhe diya gaya dilkash azab yani tu