nashe mein jhumta gata hun TuT jata hun

nashe meñ jhūmtā gaatā huuñ TuuT jaatā huuñ

tumhārā hijr manātā huuñ TuuT jaatā huuñ

ye kaisī miTTī se āḳhir mujhe banāyā gayā

kisī se haath milātā huuñ TuuT jaatā huuñ

kabhī to lagtā hai jaise maiñ ek patthar huuñ

phir itnā shor machātā huuñ TuuT jaatā huuñ

anā-parast huuñ itnā ki apne haath ke bhī

hathelī sāmne laatā huuñ TuuT jaatā huuñ

na-jāne kaun sī manzil kā maiñ musāfir huuñ

kisī bhī raah se jaatā huuñ TuuT jaatā huuñ

maiñ us kī aañkh meñ rahtā huuñ ḳhvāb kī sūrat

tulū'-e-sub.h tak aatā huuñ TuuT jaatā huuñ

kisī tarah se maiñ ḳhud ko banā to letā huuñ

phir ek 'aks banātā huuñ TuuT jaatā huuñ

nashe mein jhumta gata hun TuT jata hun

tumhaara hijr manata hun TuT jata hun

ye kaisi miTTi se aaKHir mujhe banaya gaya

kisi se hath milata hun TuT jata hun

kabhi to lagta hai jaise main ek patthar hun

phir itna shor machata hun TuT jata hun

ana-parast hun itna ki apne hath ke bhi

hatheli samne lata hun TuT jata hun

na-jaane kaun si manzil ka main musafir hun

kisi bhi rah se jata hun TuT jata hun

main us ki aankh mein rahta hun KHwab ki surat

tulu'-e-subh tak aata hun TuT jata hun

kisi tarah se main KHud ko bana to leta hun

phir ek 'aks banata hun TuT jata hun