nashshe mein hain kabhi to kabhi hain KHumar mein

nashshe meñ haiñ kabhī to kabhī haiñ ḳhumār meñ

achchhī guzar rahī hai tire intizār meñ

guzregā roz-e-hashr bhī ab intizār meñ

shāmil hai ye bhī vāda-e-fardā-e-yār meñ

chup-chāp bhī na baiTh sake bazm-e-yār meñ

majbūriyāñ bhī ġhair ke thiiñ iḳhtiyār meñ

taare bhī jhilmilā ke ba-hasrat hue ġhurūb

kyā kyā bujhe charāġh shab-e-intizār meñ

toḌe subū ko ḳhaak ki ab mohtasib ko bhī

ḳhud lutf aa rahā hai shikast-e-ḳhumār meñ

ai chashm-e-shauq jalva-e-mahbūb ke sivā

kyā kyā na dekhnā hai tujhe intizār meñ

lākhoñ qafas haiñ lā.egī kis kis meñ bū-e-gul

chaḌhne lagegī saañs sabā kī bahār meñ

nashshe mein hain kabhi to kabhi hain KHumar mein

achchhi guzar rahi hai tere intizar mein

guzrega roz-e-hashr bhi ab intizar mein

shamil hai ye bhi wada-e-farda-e-yar mein

chup-chap bhi na baiTh sake bazm-e-yar mein

majburiyan bhi ghair ke thin iKHtiyar mein

tare bhi jhilmila ke ba-hasrat hue ghurub

kya kya bujhe charagh shab-e-intizar mein

toDe subu ko KHak ki ab mohtasib ko bhi

KHud lutf aa raha hai shikast-e-KHumar mein

ai chashm-e-shauq jalwa-e-mahbub ke siwa

kya kya na dekhna hai tujhe intizar mein

lakhon qafas hain laegi kis kis mein bu-e-gul

chaDhne lagegi sans saba ki bahaar mein