nashtar si dil mein chubhti hui baat le chalen

nashtar sī dil meñ chubhtī huī baat le chaleñ

aa.e haiñ to ḳhulūs kī sauġhāt le chaleñ

vīrāniyoñ ke ghar meñ mirā dam hī ghuT na jaa.e

aa ai ḳhayāl-e-yār tujhe saath le chaleñ

jab raushnī thī chaltā thā saaya bhī saath saath

ab hai añdherī raat kise saath le chaleñ

jis meñ umīd-o-yās fareb-e-nazar rahī

is haft-ḳhvān-e-ġham kī rivāyāt le chaleñ

sham-e-umīd jis meñ farozāñ na ho sakī

ab us kī bazm-e-nāz meñ vo raat le chaleñ

kuchh bekasoñ ke ghar jale kuchh be-dayār haiñ

un ke huzūr ashkoñ kī barsāt le chaleñ

rañg-e-shafaq meñ ḳhūn-e-shahīdāñ hai jalva-gar

apne aziim mulk kī sauġhāt le chaleñ

apne nagar meñ bas yahī kircheñ haiñ har taraf

kuchh gauhar-e-talāfī-e-māfāt le chaleñ

nashtar si dil mein chubhti hui baat le chalen

aae hain to KHulus ki saughat le chalen

viraniyon ke ghar mein mera dam hi ghuT na jae

aa ai KHayal-e-yar tujhe sath le chalen

jab raushni thi chalta tha saya bhi sath sath

ab hai andheri raat kise sath le chalen

jis mein umid-o-yas fareb-e-nazar rahi

is haft-KHwan-e-gham ki riwayat le chalen

sham-e-umid jis mein farozan na ho saki

ab us ki bazm-e-naz mein wo raat le chalen

kuchh bekason ke ghar jale kuchh be-dayar hain

un ke huzur ashkon ki barsat le chalen

rang-e-shafaq mein KHun-e-shahidan hai jalwa-gar

apne azim mulk ki saughat le chalen

apne nagar mein bas yahi kirchen hain har taraf

kuchh gauhar-e-talafi-e-mafat le chalen