nashtari lafzon ka lahja marhami rakkha gaya

nashtarī lafzoñ kā lahja marhamī rakkhā gayā

zaḳhm par mirchī se pahle thoḌā ghī rakkhā gayā

'ishq meñ jis dam ḳhamīr-e-'āshiqī rakkhā gayā

husn ke andar mizāj-e-be-ruḳhī rakkhā gayā

aadmī kā imtihāñ se jab guzarnā tai huā

aadmī ko rū-barū-e-zindagī rakkhā gayā

niiñd vāloñ ko yahāñ rakkhā gayā fōtpath par

jāgne vāloñ kā bistar maḳhmalī rakkhā gayā

piine vāloñ ke bahakne se agar parhez thā

bazm meñ phir kyoñ nizām-e-mai-kashī rakkhā gayā

rakhne vaalā jāntā thā 'ishq kā ġham is liye

lutf ke pahlū meñ dard-e-‘āshiqī rakkhā gayā

un ko mahbūb-e-ḳhudā hone kā hāsil hai sharaf

shukr hai mujh ko unhī kā ummatī rakkhā gayā

chūñki rishta aadmī kā hazrat-e-ādam se hai

is liye naam aadmī kā aadmī rakkhā gayā

gardish-e-daurāñ kī tāqat kā bhī andāza huā

jab mire hī ghar kā mujh ko ardalī rakkhā gayā

aaj phir 'aḳhlāq' vā'da kar ke vo aaya nahīñ

aaj phir mujh ko ḳhushī se duur hī rakkhā gayā

nashtari lafzon ka lahja marhami rakkha gaya

zaKHm par mirchi se pahle thoDa ghi rakkha gaya

'ishq mein jis dam KHamir-e-'ashiqi rakkha gaya

husn ke andar mizaj-e-be-ruKHi rakkha gaya

aadmi ka imtihan se jab guzarna tai hua

aadmi ko ru-baru-e-zindagi rakkha gaya

nind walon ko yahan rakkha gaya footpath par

jagne walon ka bistar maKHmali rakkha gaya

pine walon ke bahakne se agar parhez tha

bazm mein phir kyon nizam-e-mai-kashi rakkha gaya

rakhne wala jaanta tha 'ishq ka gham is liye

lutf ke pahlu mein dard-e-‘ashiqi rakkha gaya

un ko mahbub-e-KHuda hone ka hasil hai sharaf

shukr hai mujh ko unhi ka ummati rakkha gaya

chunki rishta aadmi ka hazrat-e-adam se hai

is liye nam aadmi ka aadmi rakkha gaya

gardish-e-dauran ki taqat ka bhi andaza hua

jab mere hi ghar ka mujh ko ardali rakkha gaya

aaj phir 'aKHlaq' wa'da kar ke wo aaya nahin

aaj phir mujh ko KHushi se dur hi rakkha gaya