nasib achchha agar ho to bulandi khinch leti hai

nasīb achchhā agar ho to bulandī khīñch letī hai

bulandī kā ġhurūr aate hī pastī khīñch letī hai

na jaane kaisī majbūrī meñ bechī thī buzurgoñ ne

udhar jaatā huuñ to nazreñ havelī khīñch letī hai

nikal jaatī hai jab ye ruuh to kuchh bhī nahīñ rahtā

hamāre jism kī miTTī ko miTTī khīñch letī hai

kināre baiTh ke Dore na Daalā kar samundar meñ

baḌī phañs jaa.e to insāñ ko machhlī khīñch letī hai

kabhī pāmāl kartī hai ye duniyā sar-bañdhe sehre

kabhī meñhdī rache hāthoñ se surḳhī khīñch letī hai

daġhā-bāzī-o-be-rahmī sitamgārī-o-makkārī

inhī ausāf ke hāmil ko dillī khīñch letī hai

siyāsat kī qalā-bāzī baḌī dilchasp hai 'ahsan'

zarā sī chuuk ho jaane pe kursī khīñch letī hai

nasib achchha agar ho to bulandi khinch leti hai

bulandi ka ghurur aate hi pasti khinch leti hai

na jaane kaisi majburi mein bechi thi buzurgon ne

udhar jata hun to nazren haweli khinch leti hai

nikal jati hai jab ye ruh to kuchh bhi nahin rahta

hamare jism ki miTTi ko miTTi khinch leti hai

kinare baiTh ke Dore na Dala kar samundar mein

baDi phans jae to insan ko machhli khinch leti hai

kabhi pamal karti hai ye duniya sar-bandhe sehre

kabhi meinhdi rache hathon se surKHi khinch leti hai

dagha-bazi-o-be-rahmi sitamgari-o-makkari

inhi ausaf ke hamil ko dilli khinch leti hai

siyasat ki qala-bazi baDi dilchasp hai 'ahsan'

zara si chuk ho jaane pe kursi khinch leti hai