nasib apne yahan tum se bahra-war na hue

nasīb apne yahāñ tum se bahra-var na hue

tamām umr kabhī markaz-e-nazar na hue

tamām umr hamārī kuchh is tarah guzrī

tumhārī yaad se ik lamha be-ḳhabar na hue

vo kaun se haiñ marāhil rah-e-mohabbat meñ

junūn-e-ishq-o-mohabbat se bhī jo sar na hue

tumhārī yādoñ ke naġhmoñ kī guuñj ke sadqe

udaas dil ke hamāre kabhī guhar na hue

hamāre ḳhvāb salāmat tasavvurāt ba-ḳhair

nazar se duur hamārī vo raat bhar na hue

pahuñchte le ke use manzil-e-mohabbat par

nasīb aise zamāne ko rāhbar na hue

jo zabt-e-ġham ke bhī qābil na ho sake 'aḳhtar'

vahī to ashk ke qatre hue guhar na hue

nasib apne yahan tum se bahra-war na hue

tamam umr kabhi markaz-e-nazar na hue

tamam umr hamari kuchh is tarah guzri

tumhaari yaad se ek lamha be-KHabar na hue

wo kaun se hain marahil rah-e-mohabbat mein

junun-e-ishq-o-mohabbat se bhi jo sar na hue

tumhaari yaadon ke naghmon ki gunj ke sadqe

udas dil ke hamare kabhi guhar na hue

hamare KHwab salamat tasawwuraat ba-KHair

nazar se dur hamari wo raat bhar na hue

pahunchte le ke use manzil-e-mohabbat par

nasib aise zamane ko rahbar na hue

jo zabt-e-gham ke bhi qabil na ho sake 'aKHtar'

wahi to ashk ke qatre hue guhar na hue