nasim-e-subh pareshan hai dekhiye kya ho

nasīm-e-sub.h pareshāñ hai dekhiye kyā ho

ḳhizāñ kī zad meñ gulistāñ hai dekhiye kyā ho

gulāb zard huā laala dāġh-dār huā

shagūfa ḳhauf se larzāñ hai dekhiye kyā ho

irāda vahshat-o-ġhārat-garī hai zālim kā

nishāna shahr-e-nigārāñ hai dekhiye kyā ho

vo abr jis ke barasne se phuul khilte the

vo aaj sho.ala-ba-dāmāñ hai dekhiye kyā ho

lagī haiñ yāroñ kī āñkheñ na.e havādis par

har ek aa.ina hairāñ hai dekhiye kyā ho

sabhī rafīq-o-shafīq aaj chhūTe jaate haiñ

badan se ruuh gurezāñ hai dekhiye kyā ho

ġham-e-hayāt se mumkin nahīñ mafar lekin

najāt milne kā imkāñ hai dekhiye kyā ho

nasim-e-subh pareshan hai dekhiye kya ho

KHizan ki zad mein gulistan hai dekhiye kya ho

gulab zard hua lala dagh-dar hua

shagufa KHauf se larzan hai dekhiye kya ho

irada wahshat-o-ghaarat-gari hai zalim ka

nishana shahr-e-nigaran hai dekhiye kya ho

wo abr jis ke barasne se phul khilte the

wo aaj shoala-ba-daman hai dekhiye kya ho

lagi hain yaron ki aankhen nae hawadis par

har ek aaina hairan hai dekhiye kya ho

sabhi rafiq-o-shafiq aaj chhuTe jate hain

badan se ruh gurezan hai dekhiye kya ho

gham-e-hayat se mumkin nahin mafar lekin

najat milne ka imkan hai dekhiye kya ho