nasim-e-subh to kya tund-KHu hawa bhi nahin

nasīm-e-sub.h to kyā tund-ḳhū havā bhī nahīñ

ye kyā sitam hai ki vo mujh se ab ḳhafā bhī nahīñ

fasurda chehra-e-gul hai ye kaisā mausam hai

ki gulsitāñ meñ koī shoḳhī-e-sabā bhī nahīñ

kahāñ maiñ laayā gayā huuñ na koī apnā na ġhair

ilāhī lutf-e-hayāt-e-gurez-pā bhī nahīñ

ajab hai hāl-e-dil-e-zār kis zabāñ se kahūñ

ilāj-e-zaḳhm-e-tamanna tirī adā bhī nahīñ

ḳhayāl-e-garmī-e-mauj-e-nafas kī shiddat se

jalā huuñ aisā ki ab koī sānehā bhī nahīñ

isī se faash huā zindagī kā soz-e-darūñ

mirī ḳhamosh-nigāhī ki be-navā bhī nahīñ

nasim-e-subh to kya tund-KHu hawa bhi nahin

ye kya sitam hai ki wo mujh se ab KHafa bhi nahin

fasurda chehra-e-gul hai ye kaisa mausam hai

ki gulsitan mein koi shoKHi-e-saba bhi nahin

kahan main laya gaya hun na koi apna na ghair

ilahi lutf-e-hayat-e-gurez-pa bhi nahin

ajab hai haal-e-dil-e-zar kis zaban se kahun

ilaj-e-zaKHm-e-tamanna teri ada bhi nahin

KHayal-e-garmi-e-mauj-e-nafas ki shiddat se

jala hun aisa ki ab koi saneha bhi nahin

isi se fash hua zindagi ka soz-e-darun

meri KHamosh-nigahi ki be-nawa bhi nahin