nasl-dar-nasl mila hai hamein uftad ka dukh

nasl-dar-nasl milā hai hameñ uftād kā dukh

mire ajdād kā dukh hai mirī aulād kā dukh

maiñ ne jaltā huā phir paak vatan bhī dekhā

maiñ na bhūlā thā abhī kābul-o-baġhdād kā dukh

jāñ-ba-haq kitne hue aur haiñ zaḳhmī kitne

ek muddat se hai lāhaq mujhe ā'dād kā dukh

shahr-e-dā.ūd meñ suntā hī nahīñ hai koī

mere vijdān kī chīḳheñ ye mire naad kā dukh

kitne hī log baḌhe merā mudāvā karne

bāñTne koī na aaya mire ham-zād kā dukh

lauT aaya huuñ qafas meñ ba-razā-o-raġhbat

mujh se dekhā nahīñ jaatā mire sayyād kā dukh

tere hote hue har dukh meñ bhī sukh shāmil the

ab to shāmil hai har ik sukh meñ tirī yaad kā dukh

nasl-dar-nasl mila hai hamein uftad ka dukh

mere ajdad ka dukh hai meri aulad ka dukh

main ne jalta hua phir pak watan bhi dekha

main na bhula tha abhi kabul-o-baghdad ka dukh

jaan-ba-haq kitne hue aur hain zaKHmi kitne

ek muddat se hai lahaq mujhe aa'dad ka dukh

shahr-e-daud mein sunta hi nahin hai koi

mere wijdan ki chiKHen ye mere nad ka dukh

kitne hi log baDhe mera mudawa karne

banTne koi na aaya mere ham-zad ka dukh

lauT aaya hun qafas mein ba-raza-o-raghbat

mujh se dekha nahin jata mere sayyaad ka dukh

tere hote hue har dukh mein bhi sukh shamil the

ab to shamil hai har ek sukh mein teri yaad ka dukh