nasl-e-nau ke liye manzil ka nawishta rakh de

nasl-e-nau ke liye manzil kā navishta rakh de

raah meñ koī mirā naqsh-e-kaf-e-pā rakh de

rut badal jā.egī patjhaḌ kī magar shart ye hai

shāḳh par lā ke koī phuul sā chehra rakh de

hai mirī pyaas kī shiddat pe agar shak tujh ko

lā mire sāmne bahtā huā dariyā rakh de

ai javāñ mard-e-mujāhid na.e hālāt samajh

ab qalam thaam le aur haath se neza rakh de

ghar meñ fāqoñ ke sivā kuchh bhī nahīñ hai saa.il

tū hī kah de tire kaase meñ koī kyā rakh de

ai ḳhudā mujh ko haqīqat ke 'azāboñ se nikāl

merī āñkhoñ meñ koī ḳhvāb suhānā rakh de

kuchh bhī ho vo tirā ġham-ḳhvār nahīñ hai 'razmī'

belcha chhīn ke jo haath meñ kaasa rakh de

nasl-e-nau ke liye manzil ka nawishta rakh de

rah mein koi mera naqsh-e-kaf-e-pa rakh de

rut badal jaegi patjhaD ki magar shart ye hai

shaKH par la ke koi phul sa chehra rakh de

hai meri pyas ki shiddat pe agar shak tujh ko

la mere samne bahta hua dariya rakh de

ai jawan mard-e-mujahid nae haalat samajh

ab qalam tham le aur hath se neza rakh de

ghar mein faqon ke siwa kuchh bhi nahin hai sail

tu hi kah de tere kase mein koi kya rakh de

ai KHuda mujh ko haqiqat ke 'azabon se nikal

meri aankhon mein koi KHwab suhana rakh de

kuchh bhi ho wo tera gham-KHwar nahin hai 'razmi'

belcha chhin ke jo hath mein kasa rakh de