natija sunne ka ab hausla to karna hai

natīja sunñe kā ab hausla to karnā hai

vo merā hai ki nahīñ faisla to karnā hai

maiñ us ke pyaar meñ sāñseñ bhī haar saktī huuñ

is intihā se use āshnā to karnā hai

phir is ke ba.ad koī darmiyāñ na aa paa.e

ḳhayāl-e-yār ko yuuñ ham-navā to karnā hai

sabā ne dī hai ḳhabar aaj us ke aane kī

dayār-e-dil ko ab ārāsta to karnā hai

maiñ us ko dekh sakūñ aañkh band kar ke bhī

ai mere ishq tujhe mo.ajiza to karnā hai

agarche in dinoñ rahtī huuñ maiñ ḳhafā us se

magar kabhī na kabhī sāmnā to karnā hai

bichhaḌ ke jiinā agarche 'sadaf' nahīñ āsāñ

kahīñ pe ḳhatm magar silsila to karnā hai

natija sunne ka ab hausla to karna hai

wo mera hai ki nahin faisla to karna hai

main us ke pyar mein sansen bhi haar sakti hun

is intiha se use aashna to karna hai

phir is ke baad koi darmiyan na aa pae

KHayal-e-yar ko yun ham-nawa to karna hai

saba ne di hai KHabar aaj us ke aane ki

dayar-e-dil ko ab aarasta to karna hai

main us ko dekh sakun aankh band kar ke bhi

ai mere ishq tujhe moajiza to karna hai

agarche in dinon rahti hun main KHafa us se

magar kabhi na kabhi samna to karna hai

bichhaD ke jina agarche 'sadaf' nahin aasan

kahin pe KHatm magar silsila to karna hai