nau-giraftar-e-mohabbat kabhi aazad na ho

nau-giraftār-e-mohabbat kabhī āzād na ho

qaid meñ qaid rahe qaid kī mī.ād na ho

maiñ to ḳhāmosh rahūñ hijr meñ Dar hai lekin

dard uTh kar kahīñ āmāda-e-fariyād na ho

tum meñ pinhāñ haiñ mohabbat ke hazāroñ jalve

ai mirī ḳhaak ke zarro kahīñ barbād na ho

kuchh haiñ bikhre hue par kunj-e-qafas ke bāhar

ḳhauf hai aur bhī rusvā kahīñ sayyād na ho

phuuT kar kis ke ye rone kī sadā aatī hai

dard-e-ulfat kahīñ merā dil-e-nāshād na ho

dil kī īzā-talabī pūchh luuñ kyā kahtī hai

Thahro Thahro abhī dam-bhar koī bedād na ho

'shauq' kar duuñ jo bayāñ kāvish-e-ġham kī hālat

apnā qissa bhī kam-az qissa-e-farhād na ho

nau-giraftar-e-mohabbat kabhi aazad na ho

qaid mein qaid rahe qaid ki miad na ho

main to KHamosh rahun hijr mein Dar hai lekin

dard uTh kar kahin aamada-e-fariyaad na ho

tum mein pinhan hain mohabbat ke hazaron jalwe

ai meri KHak ke zarro kahin barbaad na ho

kuchh hain bikhre hue par kunj-e-qafas ke bahar

KHauf hai aur bhi ruswa kahin sayyaad na ho

phuT kar kis ke ye rone ki sada aati hai

dard-e-ulfat kahin mera dil-e-nashad na ho

dil ki iza-talabi puchh lun kya kahti hai

Thahro Thahro abhi dam-bhar koi bedad na ho

'shauq' kar dun jo bayan kawish-e-gham ki haalat

apna qissa bhi kam-az qissa-e-farhad na ho