نوخیز گلابوں کی مہک تازہ نہیں ہے

نوخیز گلابوں کی مہک تازہ نہیں ہے

کلیوں کے چٹخنے کا بھی آوازہ نہیں ہے

ہم وقت کی لہروں میں کہیں ڈوب چکے ہیں

ساحل پہ مگر لاشوں کا خمیازہ نہیں ہے

گنبد میں ہی اڑتا ہے مری سوچ کا پنچھی

زندان بدن میں کوئی دروازہ نہیں ہے

بوڑھے نے ہتھیلی پہ فلک دیکھ لیا ہے

بچوں کو کسی بات کا اندازہ نہیں ہے

سرخاب کے پر ذہن میں بے رنگ پڑے ہیں

چہرے پہ خوشی کا بھی کوئی غازہ نہیں ہے

اندر خس و خاشاک نے کہرام اٹھایا

باہر سے بکھرتا مرا شیرازہ نہیں ہے