nauKHez gulabon ki mahak taza nahin hai

nauḳhez gulāboñ kī mahak taaza nahīñ hai

kaliyoñ ke chaTaḳhne kā bhī āvāza nahīñ hai

ham vaqt kī lahroñ meñ kahīñ Duub chuke haiñ

sāhil pe magar lāshoñ kā ḳhamyāza nahīñ hai

gumbad meñ hī uḌtā hai mirī soch kā panchhī

zindān-e-badan meñ koī darvāza nahīñ hai

būḌhe ne hathelī pe falak dekh liyā hai

bachchoñ ko kisī baat kā andāza nahīñ hai

surḳhāb ke par zehn meñ be-rang paḌe haiñ

chehre pe ḳhushī kā bhī koī ġhāza nahīñ hai

andar ḳhas-o-ḳhāshāk ne kohrām uThāyā

bāhar se bikhartā mirā shīrāza nahīñ hai

nauKHez gulabon ki mahak taza nahin hai

kaliyon ke chaTaKHne ka bhi aawaza nahin hai

hum waqt ki lahron mein kahin Dub chuke hain

sahil pe magar lashon ka KHamyaza nahin hai

gumbad mein hi uDta hai meri soch ka panchhi

zindan-e-badan mein koi darwaza nahin hai

buDhe ne hatheli pe falak dekh liya hai

bachchon ko kisi baat ka andaza nahin hai

surKHab ke par zehn mein be-rang paDe hain

chehre pe KHushi ka bhi koi ghaza nahin hai

andar KHas-o-KHashak ne kohram uThaya

bahar se bikharta mera shiraaza nahin hai