nawa-e-waqt ka utra abhi KHumar nahin

navā-e-vaqt kā utrā abhī ḳhumār nahīñ

abhī talak to mujhe ḳhud pe iḳhtiyār nahīñ

huā hai ye bhī ki sahrā meñ phuul khilte haiñ

safar nasīb ke hisse meñ kyuuñ bahār nahīñ

tilism-e-jān ke sab raaz khol duuñ kaise

nahīñ nahīñ mujhe ḳhud par bhī e'tibār nahīñ

shab-e-siyāh chhupātī hai mere dāġhoñ ko

use ye kah do ki gesū abhī sañvār nahīñ

masāfatoñ kī thakan se ye jism-o-jān hai chuur

safar tavīl hai raste meñ rāhguzār nahīñ

kabhī to tishnagī kam ho hī jā.egī lekin

zamāna biit gayā utre dariyā paar nahīñ

nawa-e-waqt ka utra abhi KHumar nahin

abhi talak to mujhe KHud pe iKHtiyar nahin

hua hai ye bhi ki sahra mein phul khilte hain

safar nasib ke hisse mein kyun bahaar nahin

tilism-e-jaan ke sab raaz khol dun kaise

nahin nahin mujhe KHud par bhi e'tibar nahin

shab-e-siyah chhupati hai mere daghon ko

use ye kah do ki gesu abhi sanwar nahin

masafaton ki thakan se ye jism-o-jaan hai chur

safar tawil hai raste mein rahguzar nahin

kabhi to tishnagi kam ho hi jaegi lekin

zamana bit gaya utre dariya par nahin