naya aalam nazar aata jo main mahw-e-fughan hota

nayā aalam nazar aatā jo maiñ mahv-e-fuġhāñ hotā

zamīñ zer-e-qadam hotī na sar par āsmāñ hotā

chaman meñ barq bhī girtī to kyā ai bāġhbāñ hotā

yahī hotā mirī āñkhoñ meñ merā āshiyāñ hotā

tirī talvār ke muñh bul-havas aġhyār kyā aate

gale vo ḳhud lagā letī jo merā imtihāñ hotā

falak us ko miTātā kyā koī us ko uThātā kyā

tire dar tak jo aa jaatā vo sang-e-āstāñ hotā

shabāb aane se pahle jaan dete ahl-e-dil tum par

tumhāre daur meñ kaahe ko phir koī javāñ hotā

tire bīmār par ye raat bhārī kyoñ na ho jaatī

sitāra jo shab-e-furqat meñ girtā āsmāñ hotā

vo jab tak sāmne thā maiñ taḌaptā hī rahā 'safdar'

ajal ko jaan de detā to qātil bad-gumāñ hotā

naya aalam nazar aata jo main mahw-e-fughan hota

zamin zer-e-qadam hoti na sar par aasman hota

chaman mein barq bhi girti to kya ai baghban hota

yahi hota meri aankhon mein mera aashiyan hota

teri talwar ke munh bul-hawas aghyar kya aate

gale wo KHud laga leti jo mera imtihan hota

falak us ko miTata kya koi us ko uThata kya

tere dar tak jo aa jata wo sang-e-astan hota

shabab aane se pahle jaan dete ahl-e-dil tum par

tumhaare daur mein kahe ko phir koi jawan hota

tere bimar par ye raat bhaari kyon na ho jati

sitara jo shab-e-furqat mein girta aasman hota

wo jab tak samne tha main taDapta hi raha 'safdar'

ajal ko jaan de deta to qatil bad-guman hota