naya ek zaKHm khana chahta hun

nayā ik zaḳhm khānā chāhtā huuñ

maiñ jiine ko bahānā chāhtā huuñ

rulā detī hai har sachchī kahānī

maiñ ik jhūTā fasāna chāhtā huuñ

mahak se jhuum uTThe saarā jīvan

maiñ aisā gul khilānā chāhtā huuñ

mohabbat merī behad ḳhud-ġharaz hai

tujhe sab se chhupānā chāhtā huuñ

ye pāgal-pan nahīñ to aur kyā hai

maiñ sach-much muskurānā chāhtā huuñ

bahut mā'sūm thā vo daur-e-vahshat

maiñ phir jangal basānā chāhtā huuñ

khaao ḳhvāb yā lahrāo sāġhar

maiñ ḳhud ko bhuul jaanā chāhtā huuñ

ḳhudāyā dard ko de aur shiddat

ki maiñ ab haar jaanā chāhtā huuñ

vo aa jaa.eñ to dil par ho na qaabū

vahī qissa purānā chāhtā huuñ

mire har dukh kā kāran haiñ ye āñkheñ

maiñ ye dīpak bujhānā chāhtā huuñ

koī shahzād ko mujh paas laa.e

maiñ us kā dukh baTānā chāhtā huuñ

naya ek zaKHm khana chahta hun

main jine ko bahana chahta hun

rula deti hai har sachchi kahani

main ek jhuTa fasana chahta hun

mahak se jhum uTThe sara jiwan

main aisa gul khilana chahta hun

mohabbat meri behad KHud-gharaz hai

tujhe sab se chhupana chahta hun

ye pagal-pan nahin to aur kya hai

main sach-much muskurana chahta hun

bahut ma'sum tha wo daur-e-wahshat

main phir jangal basana chahta hun

khao KHwab ya lahrao saghar

main KHud ko bhul jaana chahta hun

KHudaya dard ko de aur shiddat

ki main ab haar jaana chahta hun

wo aa jaen to dil par ho na qabu

wahi qissa purana chahta hun

mere har dukh ka karan hain ye aankhen

main ye dipak bujhana chahta hun

koi shahzad ko mujh pas lae

main us ka dukh baTana chahta hun