naya KHayal kabhi yun dimagh mein aaya

nayā ḳhayāl kabhī yuuñ dimāġh meñ aayā

ki shola chaltā huā ḳhud charāġh meñ aayā

badan pe us ke thī shoḳhī bharī qabā-e-bahār

vo ek baaġh ke ham-rāh baaġh meñ aayā

pareshāñ tañgi-e-jā se hai garche duud bahut

ye kam hai daaġh kā sarmāya daaġh meñ aayā

kisī ne Daal diyā shak kisī ga.e kal par

maiñ muḌ ke haal se us ke surāġh meñ aayā

maiñ sochtā thā use kyā bhulā bhī pā.ūñgā

magar ye kaam baḌe hī farāġh meñ aayā

vufūr-e-garmi-e-andesha ne ḳharāb kiyā

ki baal tundi-e-mai se ayāġh meñ aayā

akelā ghūmtā phirtā rahā maiñ dariyā par

vahāñ se shaam Dhale ek baaġh meñ aayā

qarīb-e-āḳhir-e-shab ḳhatm ho ga.ī mahfil

aur is ke saath dhuāñ bhī charāġh meñ aayā

vo mere saath thā jab tak to Thiik thā 'shāhīñ'

futūr baad meñ us ke dimāġh meñ aayā

naya KHayal kabhi yun dimagh mein aaya

ki shola chalta hua KHud charagh mein aaya

badan pe us ke thi shoKHi bhari qaba-e-bahaar

wo ek bagh ke ham-rah bagh mein aaya

pareshan tangi-e-ja se hai garche dud bahut

ye kam hai dagh ka sarmaya dagh mein aaya

kisi ne Dal diya shak kisi gae kal par

main muD ke haal se us ke suragh mein aaya

main sochta tha use kya bhula bhi paunga

magar ye kaam baDe hi faragh mein aaya

wufur-e-garmi-e-andesha ne KHarab kiya

ki baal tundi-e-mai se ayagh mein aaya

akela ghumta phirta raha main dariya par

wahan se sham Dhale ek bagh mein aaya

qarib-e-aKHir-e-shab KHatm ho gai mahfil

aur is ke sath dhuan bhi charagh mein aaya

wo mere sath tha jab tak to Thik tha 'shahin'

futur baad mein us ke dimagh mein aaya