naya nazara bhi dekha hua dikhata hai

nayā nazāra bhī dekhā huā dikhātā hai

tumhārā saath bhī kyā mo'jiza dikhātā hai

kisī se apne ta'alluq ko jāñchnā paḌ jaa.e

to dekhnā vo tumheñ ḳhvāb kyā dikhātā hai

vo mujh se duur mire saath chaltā hai jaise

vo ik sitāra hai aur rāsta dikhātā hai

guzarte vaqt ko ik microscope samajh

jo qurbatoñ meñ chhupā fāsla dikhātā hai

kahā mu'āf ki jangal ghanā hai aur mire chāñd

yahāñ pe tujh se ziyāda diyā dikhātā hai

ghaḌī se tez hai shāyad ye aa.ina 'hāris'

ki pīchhe vāloñ ko aage khaḌā dikhātā hai

naya nazara bhi dekha hua dikhata hai

tumhaara sath bhi kya mo'jiza dikhata hai

kisi se apne ta'alluq ko jaanchna paD jae

to dekhna wo tumhein KHwab kya dikhata hai

wo mujh se dur mere sath chalta hai jaise

wo ek sitara hai aur rasta dikhata hai

guzarte waqt ko ek microscope samajh

jo qurbaton mein chhupa fasla dikhata hai

kaha mu'af ki jangal ghana hai aur mere chand

yahan pe tujh se ziyaada diya dikhata hai

ghaDi se tez hai shayad ye aaina 'haaris'

ki pichhe walon ko aage khaDa dikhata hai