naza ki saKHti baDhi un ko pasheman dekh kar

naza.a kī saḳhtī baḌhī un ko pashemāñ dekh kar

maut mushkil ho ga.ī jiine kā sāmāñ dekh kar

vo kabhī jab iltifāt-e-nāz se lete haiñ kaam

kaañp jaatā huuñ maiñ apne dil ke armāñ dekh kar

karte haiñ arbāb-e-dil andāza-e-josh-e-bahār

merā dāman dekh kar merā garebāñ dekh kar

vo na aglā bāġhbāñ hai ab na agle ham-safīr

yaad kartā huuñ qafas ko maiñ gulistāñ dekh kar

allāh allāh mujh sā aasī darḳhur-e-rahmat huā

rashk-e-zāhid to bhī hai ye qadr-e-isyāñ dekh kar

ai but-e-kāfir ma.āz-allāh ye terā shabāb

koī kāfir hī rahegā ab musalmāñ dekh kar

in butoñ ne mujh ko be-ḳhud kis qadar dhoke diye

sīdhā-sāda jaan kar mard-e-musalmāñ dekh kar

naza ki saKHti baDhi un ko pasheman dekh kar

maut mushkil ho gai jine ka saman dekh kar

wo kabhi jab iltifat-e-naz se lete hain kaam

kanp jata hun main apne dil ke arman dekh kar

karte hain arbab-e-dil andaza-e-josh-e-bahaar

mera daman dekh kar mera gareban dekh kar

wo na agla baghban hai ab na agle ham-safir

yaad karta hun qafas ko main gulistan dekh kar

allah allah mujh sa aasi darKHur-e-rahmat hua

rashk-e-zahid to bhi hai ye qadr-e-isyan dekh kar

ai but-e-kafir maaz-allah ye tera shabab

koi kafir hi rahega ab musalman dekh kar

in buton ne mujh ko be-KHud kis qadar dhoke diye

sidha-sada jaan kar mard-e-musalman dekh kar