نظر آ جاتے تھے دو چار کہیں بستی میں

نظر آ جاتے تھے دو چار کہیں بستی میں

اب تو کوئی بھی نہیں خاک نشیں بستی میں

کیسے خوشیوں کو اڑا لے گئی محلوں کی طلب

کتنے خوش باش تھے ہم تیرے قریں بستی میں

اس نے دروازے کو اندر سے لگا لی کنڈی

میں نے پوچھا وہ جو ہوتے تھے مکیں بستی میں

ان مکانوں میں مکاں ہے وہ جو کونے والا

ایک رہتی تھی وہاں زہرہ جبیں بستی میں

اس کو کہتے ہیں تمدن یہ ہے تہذیب قدیم

مل کے رہتے تھے سبھی اپنے تئیں بستی میں

چلتے پھرتے ہوئے قدموں کی دھمک باقی ہے

سانس لیتا ہے کوئی زیر زمیں بستی میں

اب ظہورؔ آئی سمجھ کس سے تھی رونق ورنہ

سارے موجود ہیں اک ہم ہی نہیں بستی میں