nazar aa jate the do chaar kahin basti mein

nazar aa jaate the do chaar kahīñ bastī meñ

ab to koī bhī nahīñ ḳhāk-nashīñ bastī meñ

kaise ḳhushiyoñ ko uḌā le ga.ī mahloñ kī talab

kitne ḳhush-bāsh the ham tere qarīñ bastī meñ

us ne darvāze ko andar se lagā lī kunDī

maiñ ne pūchhā vo jo hote the makīñ bastī meñ

in makānoñ meñ makāñ hai vo jo kone vaalā

ek rahtī thī vahāñ zohra-jabīñ bastī meñ

is ko kahte haiñ tamaddun ye hai tahzīb-e-qadīm

mil ke rahte the sabhī apne ta.iiñ bastī meñ

chalte phirte hue qadmoñ kī dhamak baaqī hai

saañs letā hai koī zer-e-zamīñ bastī meñ

ab 'zahūr' aa.ī samajh kis se thī raunaq varna

saare maujūd haiñ ik ham hī nahīñ bastī meñ

nazar aa jate the do chaar kahin basti mein

ab to koi bhi nahin KHak-nashin basti mein

kaise KHushiyon ko uDa le gai mahlon ki talab

kitne KHush-bash the hum tere qarin basti mein

us ne darwaze ko andar se laga li kunDi

main ne puchha wo jo hote the makin basti mein

in makanon mein makan hai wo jo kone wala

ek rahti thi wahan zohra-jabin basti mein

is ko kahte hain tamaddun ye hai tahzib-e-qadim

mil ke rahte the sabhi apne tain basti mein

chalte phirte hue qadmon ki dhamak baqi hai

sans leta hai koi zer-e-zamin basti mein

ab 'zahur' aai samajh kis se thi raunaq warna

sare maujud hain ek hum hi nahin basti mein