nazar ab farigh-ul-baali ke aate hain nahin sae

nazar ab fāriġh-ul-bālī ke aate haiñ nahīñ saa.e

hamārī tang-dastī ne kahāñ tak paañv phailā.e

ġhazab hai ye kisī kī aarzū par os paḌ jaa.e

irāda muskurāne kā kare aur aañkh bhar aa.e

bashar majbūr ho kar hī to pī jaatā hai aañsū ko

agar aisā na ho to kyā ḳhushī se koī ġham khaa.e

mirī tar-dāmanī par zāhidān-e-ḳhushk hañste haiñ

maiñ nāzāñ us kī rahmat par ye sajdoñ par haiñ itrā.e

agar kuchh lutf piine kā uThānā hai to ai rindo

chale us vaqt daur-e-jām jab kaalī ghaTā chhā.e

darāzi-e-shab-e-ġham kī shikāyat ke evaz hamdam

agar kuchh āp-bītī hī kaheñ to raat kaT jaa.e

safar tanhā hī karte haiñ adam kā ai 'riyāzī' sab

na saath ahbāb dete haiñ na hamdam aur hamsā.e

nazar ab farigh-ul-baali ke aate hain nahin sae

hamari tang-dasti ne kahan tak panw phailae

ghazab hai ye kisi ki aarzu par os paD jae

irada muskurane ka kare aur aankh bhar aae

bashar majbur ho kar hi to pi jata hai aansu ko

agar aisa na ho to kya KHushi se koi gham khae

meri tar-damani par zahidan-e-KHushk hanste hain

main nazan us ki rahmat par ye sajdon par hain itrae

agar kuchh lutf pine ka uThana hai to ai rindo

chale us waqt daur-e-jam jab kali ghaTa chhae

daraazi-e-shab-e-gham ki shikayat ke ewaz hamdam

agar kuchh aap-biti hi kahen to raat kaT jae

safar tanha hi karte hain adam ka ai 'riyazi' sab

na sath ahbab dete hain na hamdam aur hamsae