nazar bacha ke wo humse guzar gae chup-chap

nazar bachā ke vo ham se guzar ga.e chup-chāp

abhī yahīñ the na jaane kidhar ga.e chup-chāp

huī ḳhabar bhī na ham ko kab aa.e aur ga.e

nigāh-e-nāz se dil meñ utar ga.e chup-chāp

dikhā.ī ek jhalak aur ho ga.e rū-posh

tamām ḳhvāb achānak bikhar ga.e chup-chāp

ye dekhne ke liye muntazir haiñ kyā vo bhī

dayār-e-shauq meñ ham bhī Thahar ga.e chup-chāp

kareñge aisā vo is kā na thā hameñ ehsās

vo qaul-o-fe.al se apne mukar ga.e chup-chāp

fasīl-e-shahr ke bāhar nahīñ kisī ko ḳhabar

bahut se ahl-e-hunar yūñhī mar ga.e chup-chāp

dikhā rahe the hameñ sabz baaġh vo ab tak

unheñ jo karnā thā 'barqī' vo kar ga.e chup-chāp

nazar bacha ke wo hum se guzar gae chup-chap

abhi yahin the na jaane kidhar gae chup-chap

hui KHabar bhi na hum ko kab aae aur gae

nigah-e-naz se dil mein utar gae chup-chap

dikhai ek jhalak aur ho gae ru-posh

tamam KHwab achanak bikhar gae chup-chap

ye dekhne ke liye muntazir hain kya wo bhi

dayar-e-shauq mein hum bhi Thahar gae chup-chap

karenge aisa wo is ka na tha hamein ehsas

wo qaul-o-feal se apne mukar gae chup-chap

fasil-e-shahr ke bahar nahin kisi ko KHabar

bahut se ahl-e-hunar yunhi mar gae chup-chap

dikha rahe the hamein sabz bagh wo ab tak

unhen jo karna tha 'barqi' wo kar gae chup-chap