nazar bahaar na dekhe to be-qarar na ho

nazar bahār na dekhe to be-qarār na ho

ḳhizāñ sukūn se guzre agar bahār na ho

nigāh-e-dil meñ jo rañgīnī-e-bahār na ho

gunāhgār-e-tamāshā gunāhgār na ho

fareb-e-nik.hat-o-rañg āgahī shikār na ho

karishma-kār-e-chaman meñ agar bahār na ho

ḳhizāñ ke jaur-e-musalsal pe be-qarār na ho

bahār dekh magar ḳhūgar-e-bahār na ho

bajā hai ġhunche kā josh-e-numū se khil uThnā

jo gul pe aa.ī vo guzrī huī bahār na ho

mirā shu.ūr-e-bahārāñ ḳhizāñ pe ġhash ho 'sahāb'

agar vo naqs-e-bahārāñ kī yādgār na ho

nazar bahaar na dekhe to be-qarar na ho

KHizan sukun se guzre agar bahaar na ho

nigah-e-dil mein jo rangini-e-bahaar na ho

gunahgar-e-tamasha gunahgar na ho

fareb-e-nikhat-o-rang aagahi shikar na ho

karishma-kar-e-chaman mein agar bahaar na ho

KHizan ke jaur-e-musalsal pe be-qarar na ho

bahaar dekh magar KHugar-e-bahaar na ho

baja hai ghunche ka josh-e-numu se khil uThna

jo gul pe aai wo guzri hui bahaar na ho

mera shuur-e-bahaaran KHizan pe ghash ho 'sahab'

agar wo naqs-e-bahaaran ki yaadgar na ho