nazar bhi aaya to KHud se chhupa liya maine

nazar bhī aayā to ḳhud se chhupā liyā maiñ ne

ye kaun hai jise apnā banā liyā maiñ ne

tumhārā lams chhupā hai badan kī partoñ meñ

chhuā jo ḳhud ko lagā tum ko pā liyā maiñ ne

usī ke sāmne jo rahmatoñ kā mālik hai

shikāyatoñ ko duā meñ milā liyā maiñ ne

na kuchh davā kī zarūrat na chāra-gar kī talāsh

ye rog kaun sā dil ko lagā liyā maiñ ne

jhulas gayā huuñ jalā huuñ dhuāñ dhuāñ ho kar

añdherī raat se tum ko bachā liyā maiñ ne

vo milne-julne ke mausam guzar ga.e kab ke

milā jo koī gale se lagā liyā maiñ ne

tumhāre sach kī hifāzat meñ yuuñ huā aksar

ki apne-āp ko jhūTā banā liyā maiñ ne

nazar bhi aaya to KHud se chhupa liya main ne

ye kaun hai jise apna bana liya main ne

tumhaara lams chhupa hai badan ki parton mein

chhua jo KHud ko laga tum ko pa liya main ne

usi ke samne jo rahmaton ka malik hai

shikayaton ko dua mein mila liya main ne

na kuchh dawa ki zarurat na chaara-gar ki talash

ye rog kaun sa dil ko laga liya main ne

jhulas gaya hun jala hun dhuan dhuan ho kar

andheri raat se tum ko bacha liya main ne

wo milne-julne ke mausam guzar gae kab ke

mila jo koi gale se laga liya main ne

tumhaare sach ki hifazat mein yun hua aksar

ki apne-ap ko jhuTa bana liya main ne