nazar chura gae izhaar-e-muddaa se mere

nazar churā ga.e iz.hār-e-mudda.ā se mire

tamām lafz jo lagte the āshnā se mire

rafīqo raah ke ḳham sub.h kuchh haiñ shaam kuchh aur

milegī tum ko na manzil nuqūsh-e-pā se mire

lagī hai chashm-e-zamāna agarche vo dāman

bahut hai duur abhī dast-e-nā-rasā se mire

yahīñ kahīñ vo haqīqat na kyuuñ talāsh karūñ

jise gurez hai auhām-e-mā-varā se mire

kisī pe minnat-e-bejā nahīñ ki sach ye hai

sañvar ga.e dil o jaañ sheva-e-vafā se mire

girāñ haiñ kaan pe un ke vahī suḳhan jo abhī

adā hue bhī nahīñ nutq-e-be-navā se mire

khulā chaman na havā meñ phir ai naqīb-e-bahār

abhī to zaḳhm hare haiñ tirī duā se mire

nashāt o rañg ke ḳhūgar mujhe muaaf rakheñ

chhalak paḌe jo lahū sāz-e-ḳhush-navā se mire

nazar chura gae izhaar-e-muddaa se mere

tamam lafz jo lagte the aashna se mere

rafiqo rah ke KHam subh kuchh hain sham kuchh aur

milegi tum ko na manzil nuqush-e-pa se mere

lagi hai chashm-e-zamana agarche wo daman

bahut hai dur abhi dast-e-na-rasa se mere

yahin kahin wo haqiqat na kyun talash karun

jise gurez hai auham-e-ma-wara se mere

kisi pe minnat-e-beja nahin ki sach ye hai

sanwar gae dil o jaan shewa-e-wafa se mere

giran hain kan pe un ke wahi suKHan jo abhi

ada hue bhi nahin nutq-e-be-nawa se mere

khula chaman na hawa mein phir ai naqib-e-bahaar

abhi to zaKHm hare hain teri dua se mere

nashat o rang ke KHugar mujhe muaf rakhen

chhalak paDe jo lahu saz-e-KHush-nawa se mere