nazar jalwon mein bhar jae to achchha

nazar jalvoñ meñ bhar jaa.e to achchhā

muqaddar kaam kar jaa.e to achchhā

kisī sīrat pe mar jaa.e to achchhā

na sūrat par bashar jaa.e to achchhā

na gardan par rahe ehsāñ kisī kā

talab kī bhuuk mar jaa.e to achchhā

tamanna kī fusūñ-kārī kā tūfāñ

nigāhoñ se utar jaa.e to achchhā

sharāb-e-'ishq se ai jān-e-ālam

har ik paimāna bhar jaa.e to achchhā

ye zāhir hai ki dil jā.egā jaa.e

anokhī baat par jaa.e to achchhā

koī allāh kā banda navāze

mujhe begāna kar jaa.e to achchhā

guzārī 'umr aksar 'shād' rah kar

chalo yūñhī guzar jaa.e to achchhā

nazar jalwon mein bhar jae to achchha

muqaddar kaam kar jae to achchha

kisi sirat pe mar jae to achchha

na surat par bashar jae to achchha

na gardan par rahe ehsan kisi ka

talab ki bhuk mar jae to achchha

tamanna ki fusun-kari ka tufan

nigahon se utar jae to achchha

sharab-e-'ishq se ai jaan-e-alam

har ek paimana bhar jae to achchha

ye zahir hai ki dil jaega jae

anokhi baat par jae to achchha

koi allah ka banda nawaze

mujhe begana kar jae to achchha

guzari 'umr aksar 'shad' rah kar

chalo yunhi guzar jae to achchha