nazar jin ki ulajh jati hai unki zulf-e-pechan se

nazar jin kī ulajh jaatī hai un kī zulf-e-pechāñ se

vahī baḌh kar lipaT jaate haiñ aksar mauj-e-tūfāñ se

agar sharmā rahā hai mehr-e-tābāñ husn-e-jānāñ se

shafaq bhī to ḳhajil hai surḳhi-e-ḳhūn-e-shahīdāñ se

mire josh-e-junūñ ko chheḌtā hai kis liye hamdam

uTheñgī āñdhiyāñ lākhoñ ishāre haiñ bayābāñ se

Dubo kar dekh kashti-e-tamannā bahr-e-hastī meñ

ubhar aa.egā ḳhud sāhil kisī nau-ḳhez tūfāñ se

mujhe marnā mubārak bas tamannā hai to itnī hai

bujhā deñ vo charāġh-e-zindagī ḳhud apne dāmāñ se

sambhal kar rahravān-e-rāh-e-ulfat saḳht manzil hai

sadā.eñ aa rahī haiñ aaj tak gor-e-ġharībāñ se

hujūm-e-yās hī 'iqbāl' tamhīd-e-masarrat hai

ḳhushī kā baab khultā to hai lekin ġham ke unvāñ se

nazar jin ki ulajh jati hai un ki zulf-e-pechan se

wahi baDh kar lipaT jate hain aksar mauj-e-tufan se

agar sharma raha hai mehr-e-taban husn-e-jaanan se

shafaq bhi to KHajil hai surKHi-e-KHun-e-shahidan se

mere josh-e-junun ko chheDta hai kis liye hamdam

uThengi aandhiyan lakhon ishaare hain bayaban se

Dubo kar dekh kashti-e-tamanna bahr-e-hasti mein

ubhar aaega KHud sahil kisi nau-KHez tufan se

mujhe marna mubarak bas tamanna hai to itni hai

bujha den wo charagh-e-zindagi KHud apne daman se

sambhal kar rahrawan-e-rah-e-ulfat saKHt manzil hai

sadaen aa rahi hain aaj tak gor-e-ghariban se

hujum-e-yas hi 'iqbaal' tamhid-e-masarrat hai

KHushi ka bab khulta to hai lekin gham ke unwan se