nazar karo wahdat o kasrat baham shamil hain shishe mein

nazar karo vahdat o kasrat baham shāmil haiñ shīshe meñ

agar shīsha hai mahfil meñ to ye mahfil hai shīshe meñ

dil-e-nāzuk meñ āshiq ke nahīñ hai saḳht-jānī ye

fusūn-e-fikr se utrī huī ik sil hai shīshe meñ

na jā tū jaam par jamshed ke aa dekh miinā ko

yahāñ kaifiyyat-e-har-do-jahāñ hāsil hai shīshe meñ

likhā hai apne dil meñ naam terā maiñ ne san.at se

vagarna harf kā likhnā bahut mushkil hai shīshe meñ

nahīñ hai daaġh ye dil meñ ki jis se siina raushan hai

jo dekhā ḳhuub to aks-e-mah-e-kāmil hai shīshe meñ

parī-rū shīsha-e-dil meñ to hai par kyūñki dekhūñ maiñ

ki jab dekhūñ to apnā aks hī haa.il hai shīshe meñ

'hasan' gar pārsā huuñ maiñ to nā-chārī se huuñ varna

nazar hai jaam par merī sadā aur dil hai shīshe meñ

nazar karo wahdat o kasrat baham shamil hain shishe mein

agar shisha hai mahfil mein to ye mahfil hai shishe mein

dil-e-nazuk mein aashiq ke nahin hai saKHt-jaani ye

fusun-e-fikr se utri hui ek sil hai shishe mein

na ja tu jam par jamshed ke aa dekh mina ko

yahan kaifiyyat-e-har-do-jahan hasil hai shishe mein

likha hai apne dil mein nam tera main ne sanat se

wagarna harf ka likhna bahut mushkil hai shishe mein

nahin hai dagh ye dil mein ki jis se sina raushan hai

jo dekha KHub to aks-e-mah-e-kaamil hai shishe mein

pari-ru shisha-e-dil mein to hai par kyunki dekhun main

ki jab dekhun to apna aks hi hail hai shishe mein

'hasan' gar parsa hun main to na-chaari se hun warna

nazar hai jam par meri sada aur dil hai shishe mein