nazar ke dasht mein zarra talash karta hai

nazar ke dasht meñ zarra talāsh kartā hai

vo aql-mand hai hiirā talāsh kartā hai

bharosa jis ko nahīñ ḳhud hī apne baazū par

muvāfaqat kā vo halqa talāsh kartā hai

bujhā na pā.egā apnī vo tishnagī hargiz

sarāb-e-dasht meñ dariyā talāsh kartā hai

fareb khātā huuñ maiñ jaan jaan kar aksar

nayā nayā vo bahāna talāsh kartā hai

lakīreñ paḌhtā hai hāthoñ kī aur ulajhtā hai

hatheliyoñ meñ ḳhazāna talāsh kartā hai

jo zahr us ne pilāyā thā ruuh ko apnī

ab us se bachne kā nusḳha talāsh kartā hai

baḌā ajiib hai vo shaḳhs apnī hastī meñ

jo kho gayā hai vo lamha talāsh kartā hai

na niiñd aatī hai us ko na jāgtā hai kabhī

na jaane kaun sī duniyā talāsh kartā hai

jo shahr āhanī dīvār ban gayā 'ghā.il'

vahāñ vo paanī kā chashma talāsh kartā hai

nazar ke dasht mein zarra talash karta hai

wo aql-mand hai hira talash karta hai

bharosa jis ko nahin KHud hi apne bazu par

muwafaqat ka wo halqa talash karta hai

bujha na paega apni wo tishnagi hargiz

sarab-e-dasht mein dariya talash karta hai

fareb khata hun main jaan jaan kar aksar

naya naya wo bahana talash karta hai

lakiren paDhta hai hathon ki aur ulajhta hai

hatheliyon mein KHazana talash karta hai

jo zahr us ne pilaya tha ruh ko apni

ab us se bachne ka nusKHa talash karta hai

baDa ajib hai wo shaKHs apni hasti mein

jo kho gaya hai wo lamha talash karta hai

na nind aati hai us ko na jagta hai kabhi

na jaane kaun si duniya talash karta hai

jo shahr aahani diwar ban gaya 'ghail'

wahan wo pani ka chashma talash karta hai