nazar ke zawiye aksar mila ke dekhe hain

nazar ke zāviye aksar milā ke dekhe haiñ

unheñ bhī husn ke jalve dikhā ke dekhe haiñ

jo aag tum ne lagā.ī vo bujh nahīñ saktī

ġham-e-firāq meñ aañsū bahā ke dekhe haiñ

hamārā 'ishq ġham-e-dil kā aa.ina niklā

nigāh-e-husn se parde uThā ke dekhe haiñ

hazār baar raqīboñ ne rah-guzar meñ tirī

nuqūsh-e-pā-e-mohabbat miTā ke dekhe haiñ

kuchh is tarah se mohabbat kī baat karte ho

na jaane kitne hī dil meñ basā ke dekhe haiñ

hamārī ḳhvāb-e-girānī to kuchh nahīñ hotī

hasīn ḳhvāb bhī ḳhud ko jagā ke dekhe haiñ

kisī kī rāh-e-mohabbat meñ aaj tak 'qaisar'

charāġh-hā-e-tamanna jalā ke dekhe haiñ

nazar ke zawiye aksar mila ke dekhe hain

unhen bhi husn ke jalwe dikha ke dekhe hain

jo aag tum ne lagai wo bujh nahin sakti

gham-e-firaq mein aansu baha ke dekhe hain

hamara 'ishq gham-e-dil ka aaina nikla

nigah-e-husn se parde uTha ke dekhe hain

hazar bar raqibon ne rah-guzar mein teri

nuqush-e-pa-e-mohabbat miTa ke dekhe hain

kuchh is tarah se mohabbat ki baat karte ho

na jaane kitne hi dil mein basa ke dekhe hain

hamari KHwab-e-girani to kuchh nahin hoti

hasin KHwab bhi KHud ko jaga ke dekhe hain

kisi ki rah-e-mohabbat mein aaj tak 'qaisar'

charagh-ha-e-tamanna jala ke dekhe hain