nazar ki fath kabhi qalb ki shikast lage

nazar kī fat.h kabhī qalb kī shikast lage

mirī hayāt parā.e kā band-o-bast lage

na vo nuqūsh na husn-e-kashish kī baat rahī

sanam-farosh bhī jaise ḳhudā-parast lage

abhī milā thā abhī phir bichhaḌ gayā koī

ye hādsa bhī hikāyāt-e-būd-o-hast lage

farishte dekh rahe haiñ zamīn o charḳh kā rabt

ye fāsla bhī to insāñ kī ek jast lage

vahāñ safīne ko pahuñchā diyā hai tūfāñ ne

har ek mauj-e-balā ab jahāñ se past lage

tire hī ġham ne kisī samt dekhne na diyā

ki ab hujūm-e-tamannā bhī tañg-dast lage

jo terī bazm se 'bekal' chalā to hosh meñ thā

ajiib baat hai ab vo bhī mast mast lage

nazar ki fath kabhi qalb ki shikast lage

meri hayat parae ka band-o-bast lage

na wo nuqush na husn-e-kashish ki baat rahi

sanam-farosh bhi jaise KHuda-parast lage

abhi mila tha abhi phir bichhaD gaya koi

ye hadsa bhi hikayat-e-bud-o-hast lage

farishte dekh rahe hain zamin o charKH ka rabt

ye fasla bhi to insan ki ek jast lage

wahan safine ko pahuncha diya hai tufan ne

har ek mauj-e-bala ab jahan se past lage

tere hi gham ne kisi samt dekhne na diya

ki ab hujum-e-tamanna bhi tang-dast lage

jo teri bazm se 'bekal' chala to hosh mein tha

ajib baat hai ab wo bhi mast mast lage