nazar mein jazb shama-e-ruKH ka jalwa kar liya maine

nazar meñ jazb sham.a-e-ruḳh kā jalva kar liyā maiñ ne

dil-e-tārīk meñ āḳhir ujālā kar liyā maiñ ne

vo yaad aa.e to ik goshe meñ chupke chupke ro ro kar

dil-e-ranjūr kā kuchh baar halkā kar liyā maiñ ne

kabhī jo but-parastī ke maze lene ko jī chāhā

tasavvur us but-e-kāfir-adā kā kar liyā maiñ ne

jo dil chāhā to mastāna-ḳhirāmī ke tasavvur se

jahān-e-ārzū meñ hashr barpā kar liyā maiñ ne

kisī ke āriz-e-nūrīñ ke jalve yaad kar kar ke

shab-e-ġham meñ añdhere kā sahārā kar liyā maiñ ne

hadeñ miT jaa.eñ taaki imtiyāz-e-kufr-o-īmāñ kī

jamāl-e-yār ko dānista sajda kar liyā maiñ ne

mujhe kyā fikr ab ranj-e-judā.ī kī 'anīs' āḳhir

jamāl-e-ham-nashīñ ko dil meñ paidā kar liyā maiñ ne

nazar mein jazb shama-e-ruKH ka jalwa kar liya main ne

dil-e-tarik mein aaKHir ujala kar liya main ne

wo yaad aae to ek goshe mein chupke chupke ro ro kar

dil-e-ranjur ka kuchh bar halka kar liya main ne

kabhi jo but-parasti ke maze lene ko ji chaha

tasawwur us but-e-kafir-ada ka kar liya main ne

jo dil chaha to mastana-KHirami ke tasawwur se

jahan-e-arzu mein hashr barpa kar liya main ne

kisi ke aariz-e-nurin ke jalwe yaad kar kar ke

shab-e-gham mein andhere ka sahaara kar liya main ne

haden miT jaen taki imtiyaz-e-kufr-o-iman ki

jamal-e-yar ko danista sajda kar liya main ne

mujhe kya fikr ab ranj-e-judai ki 'anis' aaKHir

jamal-e-ham-nashin ko dil mein paida kar liya main ne