nazar mein koi manzil hai na jada chahta hun

nazar meñ koī manzil hai na jaada chāhtā huuñ

safar chāhe koī ho be-irāda chāhtā huuñ

ḳhushī kā kyā ḳhushī meñ chāhe kuchh taḳhfīf kar do

matā-e-ġham ziyāda se ziyāda chāhtā huuñ

mirā mafhūm āsānī se khul jaa.e jahāñ par

maiñ apnā lahja-e-izhār saada chāhtā huuñ

mirī nazroñ ko vus.at do-jahāñ kī dene vaale

maiñ dāmān-e-taḳhayyul bhī kushāda chāhtā huuñ

qayādat mujh pe nāzāñ thī kabhī manzil-ba-manzil

aur ab ḳhud hī qayādat jaada jaada chāhtā huuñ

bahut talḳhī bhare hālāt meñ jiinā paḌā hai

isī talḳhī kī ḳhātir talḳh baada chāhtā huuñ

maiñ ḳhud pahuñchūñ ki mere qadmoñ meñ chalī aa.ī

ba-har-sūrat maiñ takmīl-e-irāda chāhtā huuñ

musalsal chāhiye kī baat hai aur barmalā hai

savāl is kā nahīñ kam yā ziyāda chāhtā huuñ

jahān-e-tañg kī tañgī se merā kyā ilāqa

vasī-ul-qalb huuñ duniyā kushāda chāhtā huuñ

tire dāman-kashāñ rahne kā matlab kyā hai mujh se

yahī to hai ki maiñ tujh ko ziyāda chāhtā huuñ

alag tashkīl denā chāhtā huuñ apnī manzil

'vaqār' apne liye maḳhsūs jaada chāhtā huuñ

nazar mein koi manzil hai na jada chahta hun

safar chahe koi ho be-irada chahta hun

KHushi ka kya KHushi mein chahe kuchh taKHfif kar do

mata-e-gham ziyaada se ziyaada chahta hun

mera mafhum aasani se khul jae jahan par

main apna lahja-e-izhaar sada chahta hun

meri nazron ko wusat do-jahan ki dene wale

main daman-e-taKHayyul bhi kushada chahta hun

qayaadat mujh pe nazan thi kabhi manzil-ba-manzil

aur ab KHud hi qayaadat jada jada chahta hun

bahut talKHi bhare haalat mein jina paDa hai

isi talKHi ki KHatir talKH baada chahta hun

main KHud pahunchun ki mere qadmon mein chali aai

ba-har-surat main takmil-e-irada chahta hun

musalsal chahiye ki baat hai aur barmala hai

sawal is ka nahin kam ya ziyaada chahta hun

jahan-e-tang ki tangi se mera kya ilaqa

wasi-ul-qalb hun duniya kushada chahta hun

tere daman-kashan rahne ka matlab kya hai mujh se

yahi to hai ki main tujh ko ziyaada chahta hun

alag tashkil dena chahta hun apni manzil

'waqar' apne liye maKHsus jada chahta hun