nazar mein rahti hai aawaz mein pai nahin jati

nazar meñ rahtī hai āvāz meñ paa.ī nahīñ jaatī

tamanna vo hai jo alfāz meñ laa.ī nahīñ jaatī

tirī zulfoñ kā saudā jis ko chun le us kī ḳhush-baḳhtī

ye vo nāgin hai jo har dil pe lahrā.ī nahīñ jaatī

mohabbat mashrab-e-ahl-e-vafā meñ sar kī baazī hai

palak talvār ke saa.e meñ jhapkā.ī nahīñ jaatī

karishme aql ke phaile haiñ zarroñ se sitāroñ tak

magar phir bhī junūñ kī kār-farmā.ī nahīñ jaatī

sune duniyā tire qadmoñ kī aahaT dil kī dhaḌkan se

ye vo dhun hai ki jo har saaz par gaa.ī nahīñ jaatī

ḳhushā dard-e-mohabbat har ḳhalish jis kī hayāt-afzā

vo kaise dil haiñ jin se choT ye khaa.ī nahīñ jaatī

umīdeñ shauq ko jab tak na thoḌā sā sahārā deñ

jabīñ yuuñ hī kisī ke dar se Takrā.ī nahīñ jaatī

javānī vo hasīñ shai hai ki jā kar phir nahīñ aatī

ye vo dilkash kahānī hai jo dohrā.ī nahīñ jaatī

tasavvur munfasil hai aur basīrat sar-ba-zānū hai

tirī tasvīr meñ terī adā paa.ī nahīñ jaatī

haqīqat aap hī apne ko samjhā de to samjhā de

hamārī aap kī koshish se samjhā.ī nahīñ jaatī

tire furqat ke māroñ kī tasallī kis se mumkin hai

tabī.at ḳhud bahal jaatī hai bahlā.ī nahīñ jaatī

mohabbat dar-haqīqat ik ḳhudā kā raaz hai 'safdar'

ye vo gutthī hai jo mantiq se suljhā.ī nahīñ jaatī

nazar mein rahti hai aawaz mein pai nahin jati

tamanna wo hai jo alfaz mein lai nahin jati

teri zulfon ka sauda jis ko chun le us ki KHush-baKHti

ye wo nagin hai jo har dil pe lahrai nahin jati

mohabbat mashrab-e-ahl-e-wafa mein sar ki bazi hai

palak talwar ke sae mein jhapkai nahin jati

karishme aql ke phaile hain zarron se sitaron tak

magar phir bhi junun ki kar-farmai nahin jati

sune duniya tere qadmon ki aahaT dil ki dhaDkan se

ye wo dhun hai ki jo har saz par gai nahin jati

KHusha dard-e-mohabbat har KHalish jis ki hayat-afza

wo kaise dil hain jin se choT ye khai nahin jati

umiden shauq ko jab tak na thoDa sa sahaara den

jabin yun hi kisi ke dar se Takrai nahin jati

jawani wo hasin shai hai ki ja kar phir nahin aati

ye wo dilkash kahani hai jo dohrai nahin jati

tasawwur munfasil hai aur basirat sar-ba-zanu hai

teri taswir mein teri ada pai nahin jati

haqiqat aap hi apne ko samjha de to samjha de

hamari aap ki koshish se samjhai nahin jati

tere furqat ke maron ki tasalli kis se mumkin hai

tabiat KHud bahal jati hai bahlai nahin jati

mohabbat dar-haqiqat ek KHuda ka raaz hai 'safdar'

ye wo gutthi hai jo mantiq se suljhai nahin jati