nazar mein rang lahu mein surur bharta ja

nazar meñ rañg lahū meñ surūr bhartā jā

guzarne vaale mire dil se bhī guzartā jā

ik ek laash pe ruk kar darūd paḌh dil se

janāza-gāh-e-mohabbat pe bain kartā jā

ye rut palaT ke na aa.egī bāġh-e-hastī meñ

simaT rahī hai vo ḳhushbū so tū bikhartā jā

gul-e-ḳhayāl ko mahkā magar koī lamhe

kisī kalī meñ udāsī kā rañg bhartā jā

visāl-o-hijr meñ ḳhush rah har ek hālat se

mohabbatoñ meñ hamesha kamāl kartā jā

kahīñ tujhe bhī fanā rā.egāñ na kar Daale

tū is se pahle mirī zindagī meñ bartā jā

guzar rahā hai shab-e-intizār se 'jāved'

kisī muñDer pe taaza charāġh dhartā jā

nazar mein rang lahu mein surur bharta ja

guzarne wale mere dil se bhi guzarta ja

ek ek lash pe ruk kar darud paDh dil se

janaza-gah-e-mohabbat pe bain karta ja

ye rut palaT ke na aaegi bagh-e-hasti mein

simaT rahi hai wo KHushbu so tu bikharta ja

gul-e-KHayal ko mahka magar koi lamhe

kisi kali mein udasi ka rang bharta ja

visal-o-hijr mein KHush rah har ek haalat se

mohabbaton mein hamesha kamal karta ja

kahin tujhe bhi fana raegan na kar Dale

tu is se pahle meri zindagi mein barta ja

guzar raha hai shab-e-intizar se 'jawed'

kisi munDer pe taza charagh dharta ja