nazar mein ru-e-zeba rah gaya hai

nazar meñ rū-e-zebā rah gayā hai

yahī apnā asāsa rah gayā hai

sabhī taslīm bai'at kar chuke haiñ

bas ik apnā qabīla rah gayā hai

munāfa' be-zamīrī khā ga.ī sab

anā ke ghar ḳhasāra rah gayā hai

mirā kirdār jis meñ thā mukammal

vahī qissa adhūrā rah gayā hai

kisī darvesh kī jannat hai shāyad

jo sāhil par gharauñdā rah gayā hai

badal kar pairahan sab pārsā haiñ

mirā kapḌā purānā rah gayā hai

maiñ thā 'unvān lekin tazkira ab

zamīma-dar-zamīma rah gayā hai

madārī jā chukā kartab dikhā kar

magar har-sū tamāshā rah gayā hai

junūñ kī parvarish dil kar chukā ab

faqat iz.hār karnā rah gayā hai

'nazīr' aurang-o-afsar sab kahānī

jo thā miTTī kā kamra rah gayā hai

nazar mein ru-e-zeba rah gaya hai

yahi apna asasa rah gaya hai

sabhi taslim bai'at kar chuke hain

bas ek apna qabila rah gaya hai

munafa' be-zamiri kha gai sab

ana ke ghar KHasara rah gaya hai

mera kirdar jis mein tha mukammal

wahi qissa adhura rah gaya hai

kisi darwesh ki jannat hai shayad

jo sahil par gharaunda rah gaya hai

badal kar pairahan sab parsa hain

mera kapDa purana rah gaya hai

main tha 'unwan lekin tazkira ab

zamima-dar-zamima rah gaya hai

madari ja chuka kartab dikha kar

magar har-su tamasha rah gaya hai

junun ki parwarish dil kar chuka ab

faqat izhaar karna rah gaya hai

'nazir' aurang-o-afsar sab kahani

jo tha miTTi ka kamra rah gaya hai