نظر میں روئے زیبا رہ گیا ہے

نظر میں روئے زیبا رہ گیا ہے

یہی اپنا اثاثہ رہ گیا ہے

سبھی تسلیم بیعت کر چکے ہیں

بس اک اپنا قبیلہ رہ گیا ہے

منافع بے ضمیری کھا گئی سب

انا کے گھر خسارہ رہ گیا ہے

مرا کردار جس میں تھا مکمل

وہی قصہ ادھورا رہ گیا ہے

کسی درویش کی جنت ہے شاید

جو ساحل پر گھروندا رہ گیا ہے

بدل کر پیرہن سب پارسا ہیں

مرا کپڑا پرانا رہ گیا ہے

میں تھا عنوان لیکن تذکرہ اب

ضمیمہ در ضمیمہ رہ گیا ہے

مداری جا چکا کرتب دکھا کر

مگر ہر سو تماشا رہ گیا ہے

جنوں کی پرورش دل کر چکا اب

فقط اظہار کرنا رہ گیا ہے

نظیرؔ اورنگ و افسر سب کہانی

جو تھا مٹی کا کمرہ رہ گیا ہے