نظر نہیں تو فقط بانکپن سے کیا ہوگا

نظر نہیں تو فقط بانکپن سے کیا ہوگا

وطن میں آج پرانے چلن سے کیا ہوگا

بغیر عشق کسی انجمن سے کیا ہوگا

فسردہ دل کو بہار چمن سے کیا ہوگا

ابھی تو عشق کو تلوار بھی اٹھانی ہے

مہکتی زلف گلابی بدن سے کیا ہوگا

جدھر بھی دیکھیے منصور و ابن مریم ہیں

کسی کے شیوۂ دار و رسن سے کیا ہوگا

یہی کہ اور بھی رسوا کریں گے انساں کو

مزاج شیخ و دل برہمن سے کیا ہوگا

ٹپک رہا ہے ہر اک پھول کی جبیں سے لہو

زباں پہ ذکر بہار چمن سے کیا ہوگا

اندھیری رات میں راتوں کو پوجنے والو

یہ دیکھنا کہ سحر کی کرن سے کیا ہوگا

نگاہ وقت بڑی بے نیاز ہوتی ہے

جبین غم زدہ و پرشکن سے کیا ہوگا

ادب کو چاہئے خون دل و جگر سیفیؔ

نگینہ سازیٔ ارباب فن سے کیا ہوگا