nazar nahin to faqat bankpan se kya hoga

nazar nahīñ to faqat bāñkpan se kyā hogā

vatan meñ aaj purāne chalan se kyā hogā

baġhair 'ishq kisī anjuman se kyā hogā

fasurda-dil ko bahār-e-chaman se kyā hogā

abhī to 'ishq ko talvār bhī uThānī hai

mahaktī zulf gulābī badan se kyā hogā

jidhar bhī dekhiye mansūr o ibn-e-mariyam haiñ

kisī ke sheva-e-dār-o-rasan se kyā hogā

yahī ki aur bhī rusvā kareñge insāñ ko

mizāj-e-shaiḳh-o-dil-e-barhaman se kyā hogā

Tapak rahā hai har ik phuul kī jabīñ se lahū

zabāñ pe zikr-e-bahār-e-chaman se kyā hogā

añdherī raat meñ rātoñ ko pūjne vaalo

ye dekhnā ki sahar kī kiran se kyā hogā

nigāh-e-vaqt baḌī be-niyāz hotī hai

jabīn-e-ġham-zada o pur-shikan se kyā hogā

adab ko chāhiye ḳhūn-e-dil-o-jigar 'saifī'

nagīna-sāzī-e-arbāb-e-fan se kyā hogā

nazar nahin to faqat bankpan se kya hoga

watan mein aaj purane chalan se kya hoga

baghair 'ishq kisi anjuman se kya hoga

fasurda-dil ko bahaar-e-chaman se kya hoga

abhi to 'ishq ko talwar bhi uThani hai

mahakti zulf gulabi badan se kya hoga

jidhar bhi dekhiye mansur o ibn-e-mariyam hain

kisi ke shewa-e-dar-o-rasan se kya hoga

yahi ki aur bhi ruswa karenge insan ko

mizaj-e-shaiKH-o-dil-e-barhaman se kya hoga

Tapak raha hai har ek phul ki jabin se lahu

zaban pe zikr-e-bahaar-e-chaman se kya hoga

andheri raat mein raaton ko pujne walo

ye dekhna ki sahar ki kiran se kya hoga

nigah-e-waqt baDi be-niyaz hoti hai

jabin-e-gham-zada o pur-shikan se kya hoga

adab ko chahiye KHun-e-dil-o-jigar 'saifi'

nagina-sazi-e-arbab-e-fan se kya hoga