nazar-nawaz nazar ka ye zawiya kyon hai

nazar-navāz nazar kā ye zāviya kyoñ hai

numūd-e-aks pe hairān ā.īna kyoñ hai

zabāñ pe harf-e-anal-haq laraz rahā hai kyoñ

junūn-e-ishq tazabzub kā marhala kyoñ hai

vahī hai manzil-e-āḳhir jahāñ safar āġhāz

bañdhā huā mire qadmoñ se dā.era kyoñ hai

hayāt-o-maut kā maqsad agar nahīñ mālūm

shikast-o-reḳht kā be-kār silsila kyoñ hai

ye kis ne zahr milāyā hai jām-e-hastī meñ

ab aisā talḳh tanaffus kā zā.iqa kyoñ hai

nizām aap kā tanzīm aap kī jānāñ

to ab tamāsha-e-taftīsh-e-hādisa kyoñ hai

yahāñ to jiine ko darkār hausla hai bahut

dil-e-tabāh meñ baaqī ye hausla kyoñ hai

qadam qadam na hoñ sayyād kī bichhī āñkheñ

sajā sajā mirī manzil kā rāsta kyoñ hai

fazā-e-sher-o-suḳhan be-amāñ huī 'pinhāñ'

dayār-e-zāġh-o-zaġhan meñ ye fāḳhta kyoñ hai

nazar-nawaz nazar ka ye zawiya kyon hai

numud-e-aks pe hairan aaina kyon hai

zaban pe harf-e-anal-haq laraz raha hai kyon

junun-e-ishq tazabzub ka marhala kyon hai

wahi hai manzil-e-aKHir jahan safar aaghaz

bandha hua mere qadmon se daera kyon hai

hayat-o-maut ka maqsad agar nahin malum

shikast-o-reKHt ka be-kar silsila kyon hai

ye kis ne zahr milaya hai jam-e-hasti mein

ab aisa talKH tanaffus ka zaiqa kyon hai

nizam aap ka tanzim aap ki jaanan

to ab tamasha-e-taftish-e-hadisa kyon hai

yahan to jine ko darkar hausla hai bahut

dil-e-tabah mein baqi ye hausla kyon hai

qadam qadam na hon sayyaad ki bichhi aankhen

saja saja meri manzil ka rasta kyon hai

faza-e-sher-o-suKHan be-aman hui 'pinhan'

dayar-e-zagh-o-zaghan mein ye faKHta kyon hai