nazar nazar se wo kaliyan khila khila bhi gaya

nazar nazar se vo kaliyāñ khilā khilā bhī gayā

gul-e-murād ko qadmoñ meñ rauñdtā bhī gayā

buland shāḳh ke gul kī tarah na haath aayā

vo rif.atoñ pe rahā apnī chhab dikhā bhī gayā

mujhe naved-e-judā.ī sunāne aayā thā

judā huā to mirī samt dekhtā bhī gayā

vo zaḳhm zaḳhm pe marham lagāne aayā thā

adā-e-baḳhiya-garī se unheñ dikhā bhī gayā

vo merā shola-jabīñ mauja-e-havā kī tarah

diye jalā bhī gayā aur diye bujhā bhī gayā

vo kam-nigāh thā kam-zarf to na thā ki mujhe

pyāla de bhī gayā tishnagī baḌhā bhī gayā

suḳhan ke ā.inoñ meñ dekh dekh apne nuqūsh

jhijak jhijak bhī gayā aur jhūmtā bhī gayā

mirī hī tarah thā vo bhī junūñ kī zad meñ magar

mujhe sambhāl ke ḳhud ko sambhāltā bhī gayā

vo jis kā dāman-e-shaffāf ab bhī hai be-dāġh

vufūr-e-shauq meñ mujh ko gale lagā bhī gayā

us ik nazāre meñ the kitne dīdanī pahlū

vo mere haal pe royā bhī muskurā bhī gayā

ġham-e-vidā.a meñ pinhāñ thā aur bhī ik ġham

ki dil se shauq-e-mulāqāt-e-bārhā bhī gayā

firāq-e-yūsuf-e-gum-gashta kam na thā sādiq

ki mere haath se kan.ān-e-quetta bhī gayā

nazar nazar se wo kaliyan khila khila bhi gaya

gul-e-murad ko qadmon mein raundta bhi gaya

buland shaKH ke gul ki tarah na hath aaya

wo rifaton pe raha apni chhab dikha bhi gaya

mujhe nawed-e-judai sunane aaya tha

juda hua to meri samt dekhta bhi gaya

wo zaKHm zaKHm pe marham lagane aaya tha

ada-e-baKHiya-gari se unhen dikha bhi gaya

wo mera shola-jabin mauja-e-hawa ki tarah

diye jala bhi gaya aur diye bujha bhi gaya

wo kam-nigah tha kam-zarf to na tha ki mujhe

pyala de bhi gaya tishnagi baDha bhi gaya

suKHan ke aainon mein dekh dekh apne nuqush

jhijak jhijak bhi gaya aur jhumta bhi gaya

meri hi tarah tha wo bhi junun ki zad mein magar

mujhe sambhaal ke KHud ko sambhaalta bhi gaya

wo jis ka daman-e-shaffaf ab bhi hai be-dagh

wufur-e-shauq mein mujh ko gale laga bhi gaya

us ek nazare mein the kitne didani pahlu

wo mere haal pe roya bhi muskura bhi gaya

gham-e-widaa mein pinhan tha aur bhi ek gham

ki dil se shauq-e-mulaqat-e-barha bhi gaya

firaq-e-yusuf-e-gum-gashta kam na tha sadiq

ki mere hath se kanan-e-quetta bhi gaya